ملتقى المدونين

متحمس لتعلم اشياء جديدة مع مجموعة رائعة من الأشخاص؟

أنا وإبنى....وجوزي المرة دي!

الموضوع في 'سلسلة أنا وابنى التربوية للدكتورة نيفين مصطفى' بواسطة د. نيفين مصطفى, بتاريخ ‏26 أغسطس 2017.

أنا وإبنى....وجوزي المرة دي! 5 5 1votes

مشاركة هذه الصفحة

  1. الموضوع
  2. مراجعات (1)
قيم هذه المقالة:
/5,
  1. [​IMG]
    إلى حبيبي أبو العيال

    جيالك بكلمتين هما الخلاصة ...
    أنا قررت أتغير و أعمل نيولوك و أخس ..عيوني هتخضر و شعري يصفر ..ها .. لك شوق في حاجة تاني ؟؟؟
    قول كل اللي في نفسك .. النهاردة أوبن داي :)



    طيب أنا عارفة نفسك في إيه
    الست والدتك الكريمة
    من عيوني حاضر
    هكون ظريفة ولطيفة، وهبطل أقولها ياطنط.. وهزيل الحدود و نعمل الدولةالمتحدة.


    وبخصوص العيال
    مش هطلع أجري وراهم في الشقة، ولا هصرخ، ولا هحدف شباشب -ياختي عليا - :)
    أي أوامر تاني يا أبوالعيال ؟؟؟

    [​IMG]
    مش ببلاش
    بس إسمع ده كله مش ببلاش
    أنا ليا طلب وااااحد ملهوش تاني
    شوفت الحنية !!!

    أنا عاوزاك تعيد تظبيط السوفت وير بتاعك
    وتعيد تشكيل طبيعتك البشرية
    وتزود جرعة الحنية
    عارف يا سبعي.. الحكاية مش صعبة.. بس إنت صبرك عليا

    [​IMG]
    الانتقاد المستمر
    هو إنت بس تبطل انتقاد
    و تبدل كل انتقاداتك بالمدح و الكلام اللي بينقط سكر
    بلاش نظام الدولة البوليسية ( لوم ونقد .. إدانة و تأنيب ..كله عندك تهديد ومنع)
    يا عم أنا بخاف منك .. ومخي بينكمش وإنت بتزعق و بعجز عن التفكير.

    [​IMG]
    الثقة في قدراتي
    شوف إنت إيه اللي هيحصل لو زودت إنت جرعة الثقة فيا شوية
    فيها إيه يعنى لوالقميص إتحرق؟!
    باستمرار إقنعني إني قادرة أتجاوز فشلي
    وإن بكرة الأرز مش هيعجن وهيتظبت بعون الله>


    [​IMG]

    الشغل
    حبني أكتر من شغلك​
    متقولش ليا : (ما هو الشغل علشانك)!
    كلامك الحنين هو اللي بجد علشاني



    المقارنات
    متقارنش بيني و بين أي حد ..ها.. فاهمني طبعاً!
    وإوعى تقولي طبيخ أمي لا يعلى عليه.
    [​IMG]

    الصوت العالي
    لما أزعلك
    مش لازم لما تزعل مني في حاجة، تشغل السرينة، و الناس كلها تسمع صوتك
    مجرد نظرة.. وهأعرف إنك زعلان
    و بكده برضه إنت هتقدر توصلي شعورك بالغضب من غير ما تنقص مني.
    الصوت العالي مش الحل خالص.

    [​IMG]
    الأسلوب ال(ساندويتش)
    لما تكون مش طايق حاجة حصلت و عاوز تعاتبني.. حطهالي في ساندويتش
    مش مصدق طبعاً
    طيب بص هفهمك
    قولي مثلاً: ياه معطر الجو ده حلو ذوقك يجنن ...السرير محتاج يترتب ...تحفة بجد ترتيب التسريحة.
    كده هقوم جري أنظف وأرتب وأمسح
    ماهو إنت لفت نظري بذكاء وحنية.

    [​IMG]

    أنا أعمل إيه؟!
    هكتب كل يوم قصوصة ورق بذكرى حلوة بينا
    تبقى كده عاملة زي ألبوم الذكريات
    لما تنكد عليا.. أقرؤه وأفتكر كل حاجة حلوة.. يمكن أعرف أنسى اللي حصل.

    و هرسل رسالة موبايل أو واتس أقولك فيها (بحبك)
    متخافش.. هأعمل نفسي مصدق و أعيش الدور.. أتقمص دور العاشقة الولهانة.

    [​IMG]
    محتاجةهدنة
    جوزي يا حبيبي يا أبو العيال
    ميغركش إن كنت مش بشتغل، أو حتى بشتغل، وأزوغ من نص اليوم كده حبة لنفسي.
    الحياة كلها ضغوط .. مش هعدلك بقى.. ما إنت عارف!
    ف بلاش يا حبيب قلبي تبقى إنت و المسؤوليات على دماغي
    هتلاقيني فرقعت بجدددد.
    upload_2017-8-26_3-45-55.jpeg
    ياسلاااام بقى لو يوم الجمعة كده وإنت جاي من الصلاة جبت ليه حزمة نعناع من الراجل اللى بيقف قدام الجامع​
    و لما تديهالي.. تقولي بحنية: ( علشان عارفك بتحبي الشاي بالنعناع)
    هقوم أرقص من الفرحة .. وجري على المطبخ أعملك حلة محشي ومعاها صينية مكرونة بالبشاميل.


    الكابوريا حلوة
    جوزي حبيبي
    بلاش ترجعنا للوراء.. و تعملي فيها سفينة الصحراء و تجتر النكد
    خليك زى الكابوريا .. واتخلص من علبتك القديمة، علشان تعيش بكرة أحلى
    بس معايا يا عنيا .. وإلا إنت عارف اللي فيها :)


    [​IMG]
    رسالة لكل أم
    عزيزتي الأم المجاهدة
    عارفة هتقولي إيه
    الكلام سهل .. لكن التنفيذ صعب
    بس إنتِ محتاجة النتيجة صح ؟؟؟
    علشان كده ..هتلحي وتصبري لحد ما توصلي


    [​IMG]


    بس فى رحلة الإصرار إتغيري إنتِ كمان
    وإعملي كل اللي طلبتيه من زوجك مع إبنك الصغير
    هو كمان محتاج ده
    بس هو مش هيعرف يقول و يعبر زيك :-( !
    إحذري
    اللوم ..العتاب ...الإهانة....التوبيخ.. حاجات بتسبب الألم لكِ .. ولإبنك.
    ف بلاش تكون هي أساليبك في تربية أطفالك
    وكمان إفتكري
    المدح....الكلمة الحلوة.. احتياجات بشرية محدش بيكبر عليها

    ما تحرميش إبنك منها مهما كبر
    [​IMG]
    و كالعادة بختم حواري
    ************
    أولادنا أمانة تستحق التعب علشانها
    أولادنا محتاجين مننا ...حب ..تقبل ...اهتمام ...تشجيع ... علشان منرجعش نقول سلوكياتهم سلبية


    افتكري
    لسه الفرصة المليون لتصحيح أخطاءنا فى تربية أولادنا موجودة.

    [​IMG]

    المقال للد.نيفين مصطفى نصر
    دكتوراة في الدراسات النفسية للأطفال
    استشاري تربوي ونفسي
    مدرب بناء شخصية للأطفال ومهارات تربية للأمهات وطرق تدريس
    العديد من الدورات فى مجال الطفولة و طرق التدريس

    تحرير :أمنيه وجيه
     
    صاحب الإعلان: د. نيفين مصطفى
    إعلانات الكاتب 100% : إعلانات الموقع 0%
  2. اسلوب المقال رائع جدا بجد و كمان الصور ملفته جدا والكلام مرتب
    انا بجد استمتع من القراه بس لو انا حابه المقال بتاعي يبقي بالصورة الرائعه دي د.نيفين ممكن حضرتك تقولي لي ازاي
     
قيم هذه المقالة:
/5,

مشاركة هذه الصفحة