ملتقى المدونين

متحمس لتعلم اشياء جديدة مع مجموعة رائعة من الأشخاص؟

By Mohammad on ‏1 مايو 2017 في 16:15
  1. #1 Mohammad, ‏1 مايو 2017
    آخر تعديل: ‏3 مايو 2017
    [​IMG]

    السلام عليكم
    ازيكم يا شباب عاملين ايه
    هندخل فى الموضوع علطول بدون مقدمات لأن الموضوع أصلا طويل
    هنقول النهارده يعني ايه أدسنس وازاى نكسب منه فى كتابة المقالات فى الملتقى هنا وازاى لو حد معندوش حساب أدسنس خاص بيه يقدر يستعمل حسابي أنا للشغل هنا
    يعنى ايه أدسنس؟
    خلينى احكيلك الحكاية من البداية
    وقبل ما احكيلك الحكاية احب اقولك إن اى أحداث أو شخصيات وردت فى هذه الحكاية فهى من وحي الخيال ولا علاقة لها بالواقع إنما هى مثال لتقريب الأمور
    وأى تشابه بينها وبين الواقع فهو من نسج خيالك انت ومفيش أى حاجة من دى :)
    نبدأ الحكاية
    كلنا عارفين جوجل ونعرفه كصفحة بحث بندور فيها على أى حاجة احنا عايزينها لكن يمكن منعرفش إن جوجل دى مؤسسة ضخمة جدا ليها حاجات كتير جدا على النت زى جوجل بلاى بتاع تطبيقات الأندرويد وهى صاحبة نظام الأندرويد وهى صاحبة اليوتيوب وهى صاحبة الجى ميل ومن ضمن ممتلكاتها حاجة اسمها أدوردز وحاجة اسمها أدسنس
    تعالوا ناخد القصة من بداياتها فى العصور القديمة
    من حوالى سنة 2016 كده مثلا
    كان فى واحد صاحب أجانس عربيات وكان زمان شغال زى الفل (مولعها يعنى) لكن بقاله سنتين تلاتة كده الدنيا واقفة معاه خالص
    فى يوم قاعد على القهوة بيشرب كوباية الشاى بتاعة الصبحية وقاعد عمال ينفخ ويفش
    معدى واحد صاحبه شافه جه سلم وقعد
    = ازيك يا حاج عامل ايه؟
    - الحمد لله على كل حال
    = مالك شايل طاجن ستك ليه؟
    - والله يا صاحبى الحال ميخفاش عليك واديك شايف الأوضاع والبلد راجعة بضهرها وعمالة تقول "احترس من فضلك البلد ترجع إلى الخلف ، احترس من فضلك البلد ترجع إلى الخلف " ومش عارفين رايحة بينا على فين والمعيشة بقت صعبة.
    = ليه هو الأجانس مش شغال؟
    - لا والله الحال واقف والحركة نايمة خالص.
    = طيب عندى ليك فكرة وربنا يجعلها سبب فى فتح الأبواب المقفلة.
    - الحقنى بيها أبوس ركبك :(
    = بص يا حاج، هتطلع على العباسية ، مش العباسية المستشفى لا المنطقة وتسأل على شركة جوجل وتدخل تقول أنا عايز اعمل اعلان عن الأجانس بتاعى وهناك هيعرفوك تعمل ايه وإن شاء الله الأمور تمشي معاك.
    - يارب يسمع منك ربنا ، أنا هقوم اروح دلوقتى حالا.
    الحاج مكدبش خبر وخد ديله فى سنانه وطار على جوجل
    دخل على الموظفة فى الريسبشن
    - السلام عليكم
    = وعليكم السلام يا فندم
    - حضرتك عايز اعمل إعلان عن الأجانس بتاعى والعربيات وكده
    = تحت أمر حضرتك ، شايف المكتب اللى فى الوش دا المكتوب عليه أدوردز؟
    - اه
    = روح هناك وهم هيعملوا لحضرتك كل حاجة
    دخل على مكتب أدوردز
    - السلام عليكم
    = وعليكم السلام
    - عايز اعمل اعلان عن الأجانس بتاعي يا جماعة
    = تحت أمرك يا حاج، هاتلنا كام صورة حلوين للأجانس وشوية عربيات حديثة كده وشوف عايز تكتب ايه فى الاعلان واحنا هنقوم بالباقي
    طلع من جيبه الموبايل واداهم الصور وكتبلهم صيغة الاعلان واتفق معاهم كل زيون هيجيبوه هيديهم عليه عمولة جنييييه بحاله
    أدوردز دول ناس طيبين اوى يا خال عشان تبقى عارف
    أخد بعضه وتوكل على الله فتح الأجانس وقعد مستنى
    جيت أنا الدنيا مكحرتة معايا وراجعة بقفاها وهى مغمضة وعمالة تخبط فى الحيطان والارصفة وحالتها حالة وهتنزل بينا فى بلاعة
    وعندى موقع ولا مدونة بكتب فيها مقالات عن موديلات العربيات وأخبارها وأسعارها وايه الجديد وكده
    وعرفت ان جوجل بتدى اعلانات لأصحاب المواقع وتديهم فلوس على كل واحد ييجى من موقعه
    أنا متحدثا إلى نفسي: طيب أما اروح اشوف الحكاية دى ايه كده يمكن يكون فيها مصلحة بدل القعدة دى
    روحت على جوجل لقيت نفس الأنسة المحترمة
    أنا: السلام عليكم
    = وعليكم السلام
    أنا : حضرتك والله عندى موقع وسمعت انكم بتدوا اعلانات لأصحاب المواقع يحطوها عندهم وتدوهم فلوس عليها
    = مظبوط يا فندم، حضرتك شايف المكتب اللى فى الجنب دا اللى مكتوب عليه أدسنس؟
    أنا: ايوه
    = روح يا فندم هناك وهم هيفهموك كل حاجة.
    اتشكرتلها كتير طبعا وروحت على مكتب أدسنس
    أنا: السلام عليكم
    = وعليكم السلام
    أنا: يا جماعة أنا عندى موقع وسمعت ان عندكم اعلانات وبتدفعوا فلوس قولت اجيب أى حاجة ولو مصاريف الموقع فعايز افهم النظام ايه
    = حضرتك الفكرة بسيطة وسهلة خالص، حضرتك موقعك عن ايه؟
    أنا: موقعى عن العربيات أخبارها وانواعها وأسعارها وكده.
    = طيب لحظة كده يا فندم
    ورفع سماعة التليفون
    أيوه يا جماعة يا اللى فى أدوردز عندنا الحاج هنا عنده موقع بتاع عربيات وعايز اعلانات معندكمش حاجة مناسبة؟
    بتوع أدوردز على الطرف الآخر من الهاتف: والله الحاج ابن حلال مصفى ، لسه ماشي حالا واحد صاحب اجانس عايز يعمل اعلانات واتفقنا معاه هناخد منه جنيه على كل راس تجيله من عندنا.
    قفلوا معاهم وقالولى والله يا حج انت مرزق لسه حالا جايلنا اعلان عربيات بس احنا قبل ما نديك الاعلان محتاجين بس نبص بصة على الموقع كده ونشوفه كده متظبط تمام ومفهوش أى مخالفات وسهل التصفح كده والمحتوى جديد وحلو ونظامه وكده
    أنا: طبعا طبعا وماله ميضرش اتفضلوا
    وسبتلهم رابط الموقع وروحت.
    ربك كرم وبعدها بكام يوم اتصلوا بيا وقالولى مبروك يا حاج
    انت كسبت غسالة
    قصدى احنا وافقنا على موقعك :D
    شوف يا حاج
    احنا اتفقنا مع الراجل هناخد منه جنيه على كل راس تيجى من عندنا
    احنا هنديك انت 68 قرش من الجنيه دا واحنا هناخد الباقى يعنى انت ليك 68% من الأرباح
    أنا: ما شاء الله ما شاء الله ، دول ناس طيبين اوى يا خال
    هيدونى التلتين وياخدوا التلت.
    توكلنا على الله
    أخدت الاعلان وحطيته فى الموقع وهتلاقيه ظاهر تحت فى أخر الموضوع وفوق فى أول الصفحة اهو عندك :D
    يعنى اختصار الحكاية دى إن أدوردز وأدسنس شركتين تابعين لجوجل
    أدوردز بتاخد الاعلانات من أصحاب المنتجات أو أى شخص عايز يسوق ويعلن عن أى حاجة سواء منتج أو موقع أو غيره
    وأدسنس بتاخد الإعلان دا تديه للناشرين اللى هم أصحاب المواقع اللى عايزين يعرضوا اعلانات فى مواقعهم وبتديهم 68% من السعر اللى بيدفعه المعلن فى كل ضغطة على الاعلان بالتنسيق مع أدوردز

    طيب جه واحد حبيبى هو كمان عايز يزود دخله أو يبقاله دخل من على النت، قولتله على الموضوع قالى بس أنا معنديش موقع ولا عندى حساب فى أدسنس
    قولتله بسيطة
    بص يا سيدى ، احنا ممكن نكتب فى نفس الموقع سوا وأنا عندى جوه الحساب بتاع أدسنس أقدر اعمل أى عدد من الوحدات الاعلانية المنفصلة واسمى كل وحدة باسم
    يعنى تقدر تعتبر الوحدات دى زى مجموعة لافتات لعرض الإعلانات كل لافتة هتبقى معروفة بتاعة مين ، أنا هعملك لافتة باسمك تحطها فى مقالاتك اللى هتكتبها وأدسنس هيحسب الأرباح بتاعتها لوحدها وهتظهر عندى فى الحساب زى الصورة دى كده

    upload_2017-5-1_15-57-24.png

    شوف حضرتك الحاجات اللى عليها مربعات دى اسمها وحدات إعلانية
    أقدر أعمل أى عدد من الوحدات الاعلانية واعرض التقرير الخاص بيها بشكل منفصل زى كده

    upload_2017-5-1_16-29-10.png

    بص يا سيدى عندك هنا بيانات بكل حاجة مفصلة تقدر تعرف منها كل حاجة
    ولما أدسنس يبعت الفلوس هبعتلك أنا نصيبك
    انت بس فكر وقرر ولما تنوى تعالى ومش هنختلف فى حاجة إن شاء الله وساعتها هنشرح أكتر من كده كمان بإذن الله.

    واديك نويت وجيت وقاعد بتقرا الموضوع دلوقتى عشان تعرف النظام ايه
    ها بقى
    قولت ايه؟
    نتوكل على الله ونبدأ ورزقى ورزقك على الله؟
    لو لسه فى أى حاجة مش واضحة لا قدر الله يعنى سيب سؤالك فى تعليق وأنا هجاوبك من عنيا الاتنين
    أنا مليش بركة إلا انت يا عم الحاج
    طيب لو انت معاك حساب أدسنس؟ عادى هتشتغل بحسابك وكل حاجة هتظهر فى حسابك فى أدسنس مباشرة والأرباح هتتحول من أدسنس باسمك على الويسترن يونيون
    كان فى سؤال بيقول هو أنا ينفع افتح حساب لنفسى دلوقتى واشتغل بيه فى الموقع هنا؟
    لو عندك موقع ممكن أدسنس يقبله يبقى عادى ممكن تفتح حساب لنفسك وتشتغل بيه فى أى مكان لو معندكش موقع يقبله أدسنس يبقى مينفعش
    تعديل:
    ازاى هعرف الاعلان اللى فى المقال بتاعى ولا بتاع الموقع واعرف ازاى نسبتى ونسبة الموقع من عرض الاعلانات؟
    تحت الإعلان هتلاقى مكتوب اسم صاحب الإعلان ونسبة الموقع ونسبة صاحب الإعلان
    زى كده
    upload_2017-5-2_7-25-1.png

    بعد ما الكاتب ينزل أول مقال ليه بيراسل حد من الإدارة واحنا هنعمله وحدة إعلانية ونحطها فى حسابه هنا فى الموقع

    العملية دى بتم مرة واحدة وبعدها الاعلان بيظهر فى كل مقالات اللى كتبتيها قبل كده واللى هتكتبيها بعد كده بدون أى تدخل منك
     
    صاحب الإعلان: Forum

    الملفات المرفقة:

قيم هذه المقالة:
/5,

التعليقات

الموضوع في 'شروحات استخدام الموقع' بواسطة Mohammad, بتاريخ ‏1 مايو 2017.

مشاركة هذه الصفحة